ОшМУнун студенттери: Бишкектеги мамлекеттик түзүмдөр менен тажрыйба алмашууда.

2024-09-27 16:07:32 51

Ош мамлекеттик университетинин Экономика, бизнес жана менеджмент институтунун Мамлекеттик жана муниципалдык башкаруу кафедрасынын окутуучусу Г. Тултемирова жана улук окутуучусу М. Арапова эжекелерибиздин жетекчилиги астында 3-4-курстардын студенттери борбор калаа Бишкек шаарына тажрыйба алмашуу жана мамлекеттик түзүмдөр менен жакындан таанышуу максатында иш-сапарга барып келишти. 26-сентябрь күнү болуп өткөн иш сапар учурунда студенттер Кыргыз Республикасынын Жогорку Кеңешинин депутаттары Алишер Козуев, Эрулан Кокулов, Эльдар Абакиров жана Элвира Суравалдиева менен жолугушуп, өздөрүнүн кызыккан суроолоруна жооп алышты. Күнүмдүк иш-сапарды улай студенттер Жогорку Кеңештин жыйынына катышып, мамлекеттик башкаруу процессин көзөмөлдөн өткөрүштү. Андан соң, студенттер жана окутуучулар жаңы салынып, ишке берилген Президенттик аппараттын "Ынтымак-Манас ордосуна" саякат жасашты. Иш сапарды экинчи күнү тактап айтканда 27-сентябрь күнү студенттер КР Министрлер кабинетине караштуу Мамлекеттик кызмат жана Жергиликтүү Өз алдынча башкаруу агенттигинин жетекчиси К. Базарбаев менен жолугушуп, мамлекеттик кызмат системасындагы жаңылыктар менен таанышышты. Бул күндүн экинчи жарымында КР Президентине караштуу Ж. Абдрахманов атындагы мамлекеттик башкаруу академиясына барып, сабактарга катышышты жана Академиянын проректору проф. Э.Б. Арапова жана жаштар комитетинин мүчөлөрү менен жолугушуу өткөрүшүп, ички мобилдүүлүктү чыңдоо боюнча пикир алышышты. Бул иш-сапар өз максатына жетти десек болот. Анткени студенттердин келечектеги кесиптик багыты үчүн баалуу тажрыйбалардын катарын толуктап, мамлекеттик түзүмдөр менен тыгыз байланыш түзүү мүмкүнчүлүгү ачылды.