2025-жылдын 5-мартында ОшМУнун 117-жыйындар залында Ош шаарынын жогорку окуу жайларынын кызматкерлери жана окутуучулары үчүн «Майыптыктын социалдык модели: укуктарды, мүмкүнчүлүктөрдү кеңейтүү жана инклюзия» аттуу бир күндүк тренинг өткөрүлдү.

Тренингди эл аралык деңгээлдеги тренер, майыптыгы бар адамдардын “Теңдик” коомдук бирикмесинин төрайымы, Казакунова Гульмира Кантиновна өтүп берди.

Окууну ОшМУнун ЭБМ институтунун социалдык иштер кафедрасынын алдындагы Социалдык клиника (СК) борбору тарабынан уюштурулду. Демилгечилер жана уюштуруучулар: Социалдык клиниканын “Майыптыкты изилдөө жана майыптыгы бар жаштарды маалыматтык-консультациялык колдоо” борборунун жетекчиси, “540200-социалдык иштер” магистратура программасынын жетекчиси, социология илимдеринин кандидаты - Каримова Кундузхан Усоновна, “Социум” волонтердук клубунун жетекчиси философия илимдеринин кандидаты, улук окутуучу - Азизова Дилбара Шакировна, социология илиминин магистри, магистратура программасына жооптуу, улук окутуучу - Каримова Дилшат Сагынбаевна.

Тренингдин өтүүсүнө колдоо көрсөткөндөр – ОшМУнун мамлекеттик тил жана социалдык иштер боюнча проректору, педагогика и.к.,доцент Шарипова Мастура Сайпидиновна, ОшМУнун кесиптик бирлигинин төрагасы, доцент Саттаров Абсамат.

Социалдык иштер кафедрасында окутуучулардын тренингдерди өткөрүү демилгелерин кафедра башчысы, тарых илимдеринин кандидаты, доцент Токторбекова Нурзыйнат Асаналыевна колдоодо.

«БУУнун Туруктуу өнүгүү максаттарында (мындан ары - ТӨМ) майыптык темасы курамында беш максат камтылган жети милдетке токтолот, дагы алгы максат майыптыгы бар адамдардын кызыкчылыктарын эске алган инклюзивдүү өнүктүрүүгө байланышкан милдеттерди камтыйт». Азыркы учурда Кыргыз Республикасында туруктуу өнүгүү максаттарынын 4-8-максаттарына ылайык, майыптыгы бар жаштар үчүн билим алуу жана жумушка орношуу маселелери бүгүнкү күндө Кыргызстандагы билим берүү жана социалдык чөйрөнүн актуалдуу көйгөйлөрүнүн бири болуп эсептелет. Майыптыгы бар адамдар үчүн билим алуу мүмкүнчүлүктөрү чектелиши, алардын коомдук жана экономикалык интеграциясына тоскоолдуктарды жаратып, жаштардын толук потенциалын ишке ашыруусуна кедергисин тийгизүүдө. Ошондуктан бүгүнкү өтүлгөн тренинг жогорку окуу жайларда майыптыгы бар адамдардын укуктарын, мүмкүнчүлүктөрүн кеңейтүүнүн маанилүү кадамдары болуп саналат.

Тренингдин максаты - Ош шаарынын жогорку окуу жайларынын кызматкерлеринин жана окутуучуларынын майыптыкты түшүнүү потенциалын жогорулатуу жана социалдык-укуктук мамилени өнүктүрүү аркылуу “Майыптыгы бар адамдардын укуктары” жөнүндө Конвенциянын талаптарын, Кыргыз Республикасынын майыптык чөйрөсүндөгү мыйзамдарын жана Туруктуу өнүгүү максаттарын ишке ашырууга көмөк көрсөтүү болуп саналат.

Бул тренинг ОшМУнун квалификацияны жогорулатуу борбору менен Социалдык иштер кафедрасынын алдындагы Социалдык клиника борбору тарабынан мындан ары улантылат. Бир күндүк тренинг шаардагы окуу жайлардын административдик кызматкерлери жана ОПК, мекеме-уюмдардын кызматкерлери, магистранттар жана студенттер үчүн уюштурула турган «Майыптыктын социалдык модели: укуктарды, мүмкүнчүлүктөрдү кеңейтүү жана инклюзия» аттуу тренингдин бет ачары болуп эсептелет .

Тренингге ОшМУнун административдик кызматкерлери, ЭБМ институтунун, ТТДТТАТ Институтунун жана ИПКнын окутуучулар жамааты, магистанттар жана студенттер катышты.

Тренингдин жыйынтыгында 30 адам сертификатка ээ болушту.